O Plan de Fomento do Hockey 2026, impulsado pola Federación Galega de Hockey e patrocinado pola Deputación de Ourense dentro do programa de fomento do deporte base, deu comezo esta semana coas primeiras xornadas en centros educativos da provincia.

A actividade iniciouse no CEIP Benchoshey (Pereiro de Aguiar), primeiro centro en participar nesta edición, onde o alumnado puido gozar dunha xornada de iniciación ao hockey, combinando aprendizaxe, actividade física e diversión.

Durante esta primeira fase, que se desenvolverá ao longo de todo o mes de abril, participarán máis de 15 centros educativos e arredor de 2.000 nenos e nenas de 1º a 6º de Educación Primaria. Técnicos e monitores da Federación Galega de Hockey desprazaranse aos colexios para impartir sesións dinámicas de iniciación, achegando este deporte á comunidade escolar.

O programa continuará no mes de maio coa celebración de eventos comarcais, nos que diferentes centros compartirán unha xornada de convivencia e práctica deportiva.

Como peche, no mes de xuño celebrarase un gran evento final, reunindo a todos os centros participantes nunha xornada lúdica que servirá como colofón a tres meses de actividade.

En total, esta edición contará coa participación de máis de 2.000 escolares, 15 centros educativos e 6 concellos, consolidando un proxecto que xa foi un éxito na pasada edición.

Dende a organización destácase a importancia desta iniciativa para fomentar hábitos de vida saudables, promover o deporte base e dar a coñecer o hockey entre os máis novos.

Toda a información, novidades, calendario e galerías de fotos poderanse seguir a través da web oficial da Federación Galega de Hockey:
https://www.fghockey.gal/

Dende o pasado xoves 19 de marzo ata hoxe mesmo, disputouse en Xixón o Campionato de España de Hóckey Herba de Seleccións Autonómicas Sub14.

Galicia tivo un papel destacado neste torneo, alcanzando o Subcampionato co seleccionado masculino, que caía na final ante Andalucía, e un máis que meritorio 6º posto, coa selección feminina, que caía nos «shoot outs» ante Canarias, despois de empatar a cero.

Ademais, o noso hóckey estivo representado con solvencia a nivel arbitral, con Aitana Rodríguez e Mateo Oseguera, e tamén a nivel técnico, con Carlos Domínguez como oficial técnico.

Cabe resaltar que dous dos nosos mozos, Xabi González e Simón Cid, foron recoñecidos como os Mellores Xogadores do Campionato Masculino, cun empate nas votacións.

Parabéns a todos e a todas. 

Galicia é Hóckey!!!

A continuación deixámosvos dúas amplas galerías de fotos das nosas seleccións e a súa participación durante estes días en Asturias. Fotografías: @mspress_agency

Galería Selección Masculina

Galería Selección Feminina

Xixón será a sede do Campionato de España de Seleccións Autonómicas de Hóckey Herba Sub14 Masculino e Feminino, desde mañá xoves ao domingo 22, e cara alí viaxan hoxe nosas dúas seleccións.

Un torneo que se disputará entre os campos de xogo da Universidade Laboral e o Real Club de Cultura Covadonga e no nosos mozos e mozas enfrontaranse ás outras seleccións autonómicas paticipantes. 

Os mozos farano fronte a Cantabria, Asturias, Aragón, Comunidade Valenciana e Andalucía. Mentres, as mozas farán o propio fronte a Cantabria, Asturias, Canarias, Comunidade Valenciana e Andalucía.

Desde aquí desexámoslles moitísima sorte a todos e a todas.

Galicia é Hóckey!!!

Onte, domingo 15 de marzo, celebráronse en Verín os Campionatos Galegos de Hóckey Sala Prebenxamín e Benxamín Xunta de Galicia. 

Unha xornada espectacular pola participación dos clubes de toda Galicia que encheron de hóckey sala dos máis pequenos os dous pavillóns verineses que foron sede dos torneos.

Ata 9 clubs no campionato Prebenxamín e 7 no Benjamín, demostraron que as canteiras do hóckey galego gozan de boa saúde. 

Tras a disputa de todos os partidos celebráronse as cerimonias de entrega de medallas para todos os participantes. Uns actos nos que estivo presente Roberto Baratta, Presidente da FGH, acompañado de Diego Lourenzo, Tenente de Alcalde do Concello de Verín. 

Parabéns a todos e a todas: clubes, nenos e nenas, adestradores e adestradoras, e tamén papis e mamis… Grazas por unha xornada de hóckey sala de base tan incrible.

Galicia é Hóckey!!!

Mañá, domingo 15 de marzo, Verín acolle os Campionatos Galegos de Hóckey Sala Prebenxamín e Benxamín Xunta de Galicia. 

No Polideportivo de «A Granxa» celébrase o Prebenxamín e no Polideportivo Municipal o Benxamín.

A estes campionatos chegan os mellores equipos da liga regular de cada unha das provincias galegas. 

Así, na categoría Prebenxamín competirán: H.C. Santo Domingo de Padrón, OurenSticks, C.H. Támega, Irmáns Villar, H.C. Verín, Atlántico H.C., Albor C.H., Escola H.C. e C.H. Barrocás. 

Mentres, no torneo Benxamín farano: Albor C.H., C.H. Barrocás, Escola H.C., APA Oleiros, Atlántico H.C., Irmáns Villar e H.C. Verín. 

Sen dúbida será unha xornada única na que os máis pequenos do noso deporte gozarán competindo e compartindo o seu hóckey sala.

Moita sorte a todos e a todas.

Galicia é Hóckey!!!

Os nosos Sub16 participaron no torneo que se celebrou esta fin de semana en Valencia. Un torneo no que competiron ao máis alto nivel coas seleccións autonómicas de toda España, alcanzando finalmente a selección masculina o 7º posto e a feminina o 9º. O campionato pechábase cun primeiro posto masculino para Cataluña e no cadro feminino para a Comunidade de Madrid.

Ademais, a Máxima Goleadora do Torneo Feminino foi unha das nosas, Paula Sánchez Gerpe, con 10 goles.

E o papel de Galicia non se limitou aos xogadores e xogadoras senón que tamén estivemos perfectamente representados polos árbitros, Nerea Andrade e José Miguel Guevara.

Parabéns a todos e a todas pola vosa participación. 

Galicia é Hóckey.

O campionato, que se celebra en Ourense do 3 ao 5 de xullo, acollerá ás seleccións autonómicas masculinas e femininas de toda España e será un dos eventos máis relevantes do hóckey nacional. 

A Federación Galega de Hóckey, a través da Fundación Amare Terra, lanza esta campaña para recadar doazóns que sirvan como axuda para garantir unha organización de calidade: arbitraxes oficiais, seguridade, atención médica, material regulamentario, trofeos e difusión do evento.

Co teu apoio, o noso deporte de base seguirá crecendo.

Podes facer a túa achega a través desta ligazón: t.ly/zX7fd

Doa e forma parte deste campionato, porque Galicia é Hockey!!!

Desde mañá e ata o domingo os nosos mozos e mozas participarán no Campionato de España de Seleccións Autonómicas que se celebra en Valencia. 

Un torneo no que a selección masculina medirase a Cataluña, Euskadi, Comunidade Valenciana, Asturias, Cantabria, Canarias, Aragón, Andalucía e Comunidade de Madrid. E a nosa selección feminina farao fronte ás mesmas comunidades ás que se engade a Rexión de Murcia.

Mañá xoves darán comezo os partidos, sendo as mozas as primeiras en debutar ás 11:45h fronte a Canarias. E os mozos xogarán o seu primeiro partido ás 16:15h fronte a un rival que sairá do vencedor do partido entre Aragón e Valencia que se disputa pola mañá. 

Os partidos poden seguirse en Streaming a través da Canle de Youtube da Federación Valenciana de Hóckey: https://www.youtube.com/@FHCVTV

Desde aquí desexámoslle o mellor aos nosos mozos e mozas!!!! 

Imos Galicia!!!

Nesta fin de semana adicada aos Alevíns, tamén se celebrou o Campionato Galego de Hóckey Sala Alevín Mixto Xunta de Galicia. 

O domingo, no Polideportivo Municipal de Oira de Ourense, e co C.H. Albor como co-organizador disputouse o campionato na modalidade Mixta.

A clasificación final foi:
1º C.H. Albor

2º Escola H.C.

3º A.D. Cristo Rey

4º Atlántico H.C.

5º Verín H.C.

Outra xornada chea de amizade, deportividade e moito hóckey.

Parabéns a todos e a todas.

O pasado sábado celebrouse o Campionato Galego de Hóckey Sala Alevín Feminino Xunta de Galicia. 

O Polideportivo Municipal do Ventorrillo foi a sede deste torneio que estivo co-organizado polo Escola H.C.

A clasificación final do campionato foi a seguinte: 

1º Escola H.C.

2º OurenSticks

3º Barrocás C.H.

Unha xornada de bo ambente na que se compartiron momentos de deportividade e amizade.

Parabéns a todos e a todas.