Este venres 9 de maio tivo lugar en Ribadavia o comezo oficial das Xornadas Comarcais do Plan Fomento Hockey Deputación de Ourense, unha iniciativa impulsada pola Federación Galega de Hockey co apoio da Deputación Provincial.
A xornada desenvolveuse nas instalacións do CEIP Plurilingüe de Ribadavia e contou coa participación de máis de 200 alumnos e alumnas de 1º a 6º de primaria. Durante toda a mañá, o alumnado puido gozar de actividades de iniciación ao hockey , combinando xogos, dinámicas por estacións, partidos e pequenas charlas educativas sobre o deporte.
O obxectivo principal destas xornadas é achegar o hockey aos centros educativos da provincia, promovendo valores como a convivencia, o xogo limpo, a actividade física e o traballo en equipo a través dunha disciplina pouco coñecida pero con gran potencial.
Desde a Federación Galega de Hockey agradecemos especialmente a colaboración do CEIP Plurilingüe de Ribadavia, pola súa disposición e participación, e á Deputación de Ourense, cuxo apoio fai posible este proxecto.
📅 As xornadas comarcais continuarán nas seguintes datas:
-
22 de maio – Expourense (no marco do evento SPORTUR)
-
30 de maio – A Rúa
-
13 de xuño – Gran evento final en Mariñamansa (Ourense)
Seguimos traballando para que o hockey chegue a máis centros e máis nenos e nenas de toda a provincia.
